Arsenal - Chelsea

Не знам за вас, но 3 дена по поразот од Манчестер ми изгледа како утакмицата да се играла пред 3 години. Се сеќавам на многу малку работи, поединечни слики и морам да се сложам со Венгер дека и се чувствувам како и да не се одиграла утакмицата. Ме потсеќа на постарите верзии на Football Manager кога немаше ’слика’ од утакмицата него само текст и конечен резултат. Без разлика на се, противникот беше подобар и заслужи да оди понатаму.

За Арсенал останува да се доиграат утакмиците со Челзи, МанЈу и Стоук и колку толку да се одржи позитивниот тренд во ЕПЛ како еден вид вовед во предсезоната и наредната сезона. Во овој момент, непотребно и бесполезно е да се обвинуваат поединци за поразите - одговорноста лежи кај сите. Ова не значи дека истата се разводнува со тоа што се распределува помеѓу играчки и тренерски кадар од околу 30тина луѓе. Напротив, ова значи дека секој еден од нив неопходно е да се погледне себе си и да се запраша неколку важни работи. Веројатно најмногу од сите тоа треба да го направи Арсен Венгер. Не затоа што не е добар менаџер, тренер или стратег, туку затоа што е симптоматично екипата, без разлика на сите пехови и проблеми, да не може да го направи конечниот исчекор кон ’Greatness’.

Лани се сопнавме пред целта, воглавном поради психолошки пад и отсуство на неколкумина првотимци, годинава дежаву или дежави, како сакате. Дебатата ќе продолжи на тема дали Сонг, Гибс, Денилсон, Диаби, Бендтнер, Вела, Џуру и Ебуе се доволно добри да ги заменат Сеск, Насри, Ван Перси, Клиши, Галас, Адебајор и сл. во моменти кога е најпотребно токму поради овој симптоматичен тренд. Сите се уверивме колку многу врвни играчи како Аршавин можат да сменат за мал временски период и веројатно тоа е само аргумент повеќе за оние кои сакаат да видат сериозни дополнувања или промени во составот. Прашањето пак од друга страна е колку често се појавуваат играчи интелигентни и способни да се адаптираат и да придонесат како што тоа го направи Русинот? Според мене можеби на прсти можат да се избројат. Но, ова е тема која менаџментот сигурно сериозно ќе ја разгледува на чело со Венгер и можеби по подолго време ќе видиме некои поместувања од досегашната политика. Од оние чии глави најмногу се бараат, Адебајор веќе излезе со потврда дека ќе биде повторно во Арсенал следната сезона и доколку Венгер не реши да го продаде на своја рука, за жал на некои, но и на радост на некои други, 25ката ќе продолжи. Волкот веќе му се придружи со тоа што потпиша нов договор а веројатно следен потег ќе биде и да се обезбеди потписот на Ван Перси. Од останатите чии договори се пред крај само Галас и Силвестре се под знак прашање, што е одличен вовед во наредниот дел од она што сакам да го напишам а тоа е ситуацијата со штоперите во Арсенал.

Пред некоја недела започнав една мини анализа на кадарот со кој располагаме и негова споредба со она што го имаат другите па сакам да продолжам тука. Значи прво, со што располагаат останатите:

Манчестер: Фердинанд, Видиќ, Еванс, О’Шеј
Ливерпул: Карагер, Шкртел, Агер, Хипиа (во заминување)
Челзи: Тери, Алекс, Карваљо, Ивановиќ

5. Коло Туре - искусен, моментално здрав и квалитетен играч кој помина една ролекостер сезона: маларија, очајна форма, зголемување на задникот за 10цм во пречник, кавга со Галас, барање на трансфер за сето тоа да заврши со натпревари во феноменална форма. Останува.

20. Јохан Џуру - малер невиден со повреди, ме потсеќа на Диаби. Венгер е трпелив човек и им дава шанси на оние кои се квалитетни а Јохан е квалитетен играч. Како што Сендерос доби еден куп шанси, така мислам дека и Џуру ќе добие. Останува.

10. Вилијам Галас - доколку Галас беше здрав, Арсенал ќе имаше далеку поголеми шанси за пласман барем во едно финале годинава. Во моменти кога со Туре делуваа како вистински тим, една ретко возможна секвенца на настани го отстрани од терените до крајот на сезоната и тимот мораше да се потпре на уште еден рековалесцент Силвестре. Имам голема почит спрема Галас поради неговиот победнички менталитет и цврст карактер кој најдобро го демонстрираше со неговата феноменална игра откако му беше одземена капитенската лента, настан кој многу луѓе би исфрлил од форма. Но не и Галас. Сепак, со оглед на сите настани мислам дека Галас самоиницијативно ќе си замине (моја претпоставка во Франција) и ќе создаде место за нова аквизиција на оваа позиција.

18. Микаел Силвестре - моето мнение за него го имам кажано во многу наврати и да не беше толку подлежен на повреди ќе беше од поголема корист. Сепак, не гледам иднина за него во Арсенал. Уште едно место кое треба да се пополни.

6. Филип Сендерос - заборавениот Сендо ја помина сезоната во Милан на позајмица и од она малку што следам калчо, не се наигра и покрај повредите во одбраната на Милан, особено онаа на Неста. Дали Венгер ќе го врати и ќе му даде уште една шанса искрено не верувам, но од друга страна неговата прагматичност и скржавост не ми дозволува премногу да се олабавам. Доколку Венгер успее да најде уште еден пред се квалитетен питбул од типот на Туре (М. Ричардс или Басонг) тогаш со Сендо во екипата би имале двајца високи (Швајцарците) и двајца пониски но побрзи штопери, што би овозможило добар избор за секоја прилика. Сепак мислам дека Сендо ќе добие ’исписница’ и ќе ја продолжи кариерата во Серие А или Бундеслига Ајнц.

Да не го заборавам и Алекс Сонг кој на позиција штопер одигра сосема солидно во малкуте натпревари што ги играше тамо како бекап и младите Кајл Бартли (кој имал среќа да ги гледам младинците се уверил дека е солиден и Хавард Нордтвеит кој иако помпезно најавуван досега е само разочарување. Во споредба со противниците можам да кажам дека сме веројатно еден ако не и двајца врвни , но и искусни фудбалери пократки од останатите, особено во позиција кога Туре или Галас се аут. Ова, заедно со фактот дека имаме најмногу примени голови од останатите во топ 4 наметнува размислување дека оваа позиција е една од оние кои Венгер ќе треба сериозно да ги разгледува почнувајќи од вчера.

За крај, натпреварот со Челски во Недела. Некои видов го најавуваат како борба за трето место во Европа а некои пак борба за гордост. Мене ми изгледа како борба за 3 бода која би не донела на -3 со нив и со минимална шанса да скокнеме едно место погоре до крајот на сезоната. Начинот на кој Челски беа ограбени во средата беше за секоја осуда: кога може да им се случи на нив, може на секого - затоа и не бев нешто особено среќен да ги видам Барселона во финале. Не постои ниедно нормално ниту логично објаснување за кардиналното игнорирање на фудбалски правила кои еден арбитар треба да ги спроведува освен дека а) е малоумен б) извршува нечија агенда. Шпекулирање и теории на заговор се тешки за докажување, но јас едноставно не можам да разберам. Се надевам дека лузната на нивната психа по поразот е подлабока од онаа нашата и во комбинација со еден ден помалку одмор ќе ни оди во прилог.

Составот според мене би требало да биде овој:

---------------Алмуниа
--------Сања - Туре - Џуру - Ебуе
Волкот- Сеск - Денилсон - Сонг - Арш
--------------Бендтнер

клупа:Фабиански, Вела, Гибс, Ремзи, Адебајор, Силвестре, Насри

Поздрав